2020-mi
innuttaasut amerlassusissaannut naatsorsuutit
Nuna tamakkerlugu innuttaasut amerlassusissaannut ukiumoortumik naatsorsuutit ulloq 15.maaji 2020 Naatsorsueqqissaartarfimmit saqqummersinneqarput.
Innuttaasut
amerlassusissaannut naatsorsuutini pineqartuni ukiuni makkunani missiliorlugit
850-it inunngortarnerat, 550-illu missaanniittut toqusarnerat
tunngavigineqarput. Meeqqiortarnerup toqusoqartarneraniit missiliorlugu 300-nik
amerlanerunerata innuttaasut amerlanerulertittussaagaluarpai, ukiumulli allamut
nunasiartortartut nunasisunit missiliorlugit 350-inik amerlanerulermata,
innuttaasut ataatsimut amerlassusaat ikilipput.
Tamanna
ukiuni tulliuttuni annertunerulissaaq 1960-ikkut aallartinnerini
inuusimasorpassuit ukiunut utoqqanngorluni toquffiunerpaasartunut massakkut
qanilliartormata. Ukiunittaaq tulliuttuni qulini arnat ukiuni
meeqqiorfissaminniittut ikinnerulissapput, taamaasilluni meeqqiortarneq
annertussusissaminiikkaluartoq aamma ukiumut inunngortartut amerlassusaat
ikinnerulissapput.
Piffissami
2050-ip tungaanut nuna tamakkerlugu innuttaasut amerlassusissaannut
naatsorsuutit Kisitsisaataasivimmi nassaarineqarsinnaapput.
2020-miit
2030-mut sumiiffinni innuttaasut amerlassusissaannut naatsorsuutit pillugit
2020-mi
januaarip aallaqqaataanit nuna tamakkerlugu, kommunikkaartumik,
distriktikkaartumik kiisalu inoqarfinni innuttaasut amerlassusaat
(annertussusaat) malillugit eqimattakkaartumik naatsorsuutit inerneri
annertunerusumik paasissutissallit Kisitsisaataasivimmi
nassaarineqarsinnaapput.
Tabeli: http://bank.stat.gl/BENP20REG, nunap
sumiiffiini tamani innuttaasunut tamanut 2000-imiit 2030-mut, Kalaallit
Nunaanni inunngorsimasunut kiisalu innuttaasut tamakkerlugit naatsorsuutaannik
sisamanik suiaassutsinut ukiullu malillugit immikkoortiterneqarsimasunik
imaqarpoq.
Tabeli: http://bank.stat.gl/BENP20REGC, nunap
sumiiffiini agguataarneqarsimasuni innuttaasut amerlassusissaanni ukiumoortumik
allannguutinik naatsorsukkanik imaqarpoq.
Naatsorsuutit
saqqummersitami matumani takutinneqartut Kisitsisaataasivimmiittullu
2030-muinnaq killipput, tabelinilu takutinneqartut 2050-imoortut
naatsorsuinermi assersuutitut atorneqarput. 2050-ip tungaanut tabelit
Naatsorsueqqissaartarfimmut saaffiginninnikkut piniarneqarsinnaapput.
Nunap
sumiiffiinut naatsorsuutit immikkoortillugit suliarineqarput, tassani nuna
tamakkerlugu ataatsimut katillugit inernerit kommunit malillugit suliarineqarsimasut,
distriktikkaartumik suliarineqarsimasut ataatsimut katinnerinit allaanerupput.
Siunissaq ungasinnerusoq eqqarsaatigalugu naatsorsuutit pineqartut
nikingassutaat anneruleriartussaaq.
Sumiiffinni
innuttaasut amerlassusissaannut naatsorsuutit nuna tamakkerlugu naatsorsuutit
inernerinut ersarissaapput, tassani takutinneqarmat innuttaasut tamakkerlutik
amerlassusaat ukiuni qulini tulliuttuni 1.300-nik ikinnerulissasut (nuna
tamakkerlugu amerlassusissaannut naatsorsuutini 1.500-nik ikinnerussasut
naatsorsorneqarpoq). Toqusoqartarnera naatsorsuutigineqartutut
annikinnerulissanngippat, ukiunilu tulliuttuni tallimani nikigani, Kalaallit
Nunaanni innuttaasut 2.100-nik ikinnerulissapput (nuna tamakkerlugu
naatsorsuutini 2.500-t). Ukiulli tulliuttut qulit ingerlanerini allamut
nunasiartortartut affaannanngoraluarpata Kalaallit Nunaanni innuttaasut
ullumikkornit 400-nik amerlanerulissagaluarput.
Naatsorsuutit nuna tamakkerlugu naatsorsuutini ilimagisanit tunngaveqarput, nunalli sumiiffiisa akornini nuuttarnernik ilaneqarlutik. Sumiiffinni innuttaasut amerlassusissaannut ukiuni tallimani kingullerni nuuttarnerni nunasisarnernilu misilittakkat atorneqarput. Nuna tamakkerlugu innuttaasut amerlassusissaannut naatsorsuutini ukiuni kingullerni qulini misilittakkat atorneqarmata, naatsorsuutini matumani pineqartuni misilittakkat ukiuni qaninnerni pisimasut atorneqarput. Taamaattumik siuliani innuttaasut amerlassusissaannut saqqummersinneqartumit inernerit nikingassuteqalaarput.
Uumallutik
inunngortut sumiiffinni meeqqiortarnerit annertussusaat malillugit
naatsorsorneqarput, taamatuttaaq toqusoqartarnera sumiiffinni toqusoqartarnerit
annertussusaat malillugit suliarineqarluni.